Alla Itolae Nusa 35
Kena rebai sae me Alla Ibeteke loko Yakupe be, “Au meije Alla rebe Au aselukeKu ete ale kena anaya bei kwalimu Esaure. Aakneka leke keu lopai Betele leke arue ete mere, kai eleke otoi maka pala tenei rebe rilukele ete Alla ete mere.”
Eleki Yakupe ibeteke loko pusue eni bina kai eni nanaesi kai pusue tamata rebe esi rue sakesa kaine be, “Ite keu bei meije lopai Betele kai ete mpaije au eleke otoi maka pala tenei rebe rilukele ete Alla rebe Itapa au kena petu rebe susate kai iraka au kena au keu loko atoi sae neka. Hoko tanei saisa rebe hlaleke lokoe, rebe imi keriule, imi poyelu. Kai andita nanakwalaimie kai imi suli pakiane misete.”
[tolong lihat ayat sebelumnya]
Eleki esi riluke pusue tuhane tinai mo rebe tamata makete esi hlaleke lokole esi lakaije, rebe esi kerie kai esi antin-antinaru ete Yakupe. Eleki Yakupe ikalie taneia meru kena ai elake uwei sae me tehaike kota Sikheme.
Kena Yakupe kai eni lumatoine esi keure, Alla Iono tamata me kota me keholiaru rilasi eti esi sui loko Yakupesi moneka.
Eleki esi roma me tape Kanane me kota Betele. Kota mere akmenare esi nane Luse.
Ete mere Yakupe ieleke otoi maka pala tenei rebe rilukele ete Alla, kai iono esi nane, “El-Betele.” Le Alla IaselukeNi etei ete mere kena inaya bei kwaline.
Eleki ete mere Debora, Ripka inai makarakare imata. Eleki esi hnoukeni kena ai elake uwei sae sapleuke selatane bei kota mere. Hoko esi kotie ai elake mere esi nane, “Ai elake rebe rani kenae.”
Yakupe kai eni lumatoine esi rue me tape Padan-Arame takwali peneka. Eleki esi leu lopai eni tape Kanane. Hoko kena esi kusu tape Kanane Alla IaselukeNi lokoi kai Iriluke misete etei.
Hoko Alla Ibeteke lokoi be, “Amu nane Yakupe po bei pitoini meije amu nane Yakupe moneka po amu nane Israele, amu nane ele mere.”
Hoko Alla Ilelike eni nane Israele.
Eleki Alla Italuke misete etei be,
“Aure Alla, Auku kbasare ela titinai, hoko anebu boka eti amu anubuaru esi ono nusa toini kai tamata totoini esi bei ale lekwe kai kamalaru esi bei ale.
Kai tape Kanane meije, rebe Au sepakele ete Abrahame kai Isake Au betekele ete ale leke amu anubua pamulire esi rue kenae.”
Eleki Alla Isa lolete bei Yakupe bei me otoi rebe Ibeteke kenaije.
Eleki Yakupe ieleke lisi bei batu elake nanuke, eleki isoba anggure kwelini kai leite boini ntelete kenae hoko mere iriluke ete Alla le Alla Iono misete etei.
Eleki Yakupe iono otoi rebe Alla Ilepa kaine esi nane Betele, esi natire Alla Eni luma.
Eleki esi keu rame bei Betele lora kota Hebrone. Hoko kena mere Rahela ikeu blublulu peneka eleki kena esi lau bei kota Eprata moneka Rahela iruele kwetele po susa kuate.
Kena isusa kuate kena ruele kwetele mere, biane ibeteke lokoi be,
“Aktilini le meije kwete mokwai.”
Eleki kena teu Rahela eni nasite nere ibeteke kwetele mere eni nane Benoni, esi natire nanae kena au supu susate. Po amai iono eni nane Benjamine, esi natire bala makwanale.
Rahela imatare ele mere. Eleki hnoukeni kena lalane leini tehaike Eprata, pamuli meije esi nane Betleheme.
Eleki Yakupe ieleke lisi kena lataije. Lisi kena Rahela latai mere eti roma meije neka. Eleki esi keu rame lora kota Hebrone.
Eleki Israele (eni nane kena akmenare Yakupe) esi keu rame bei mere eleki esi ono tenda me lisi Edere esi leine.
Eleki kena Israele esi rue me otoi mere, kena rebai sae me eni nanae Rubena intulu kai eni bina piala Bilha, eleki amai irekwae kai inasu titinai.Yakupe eni nana mokwaiya sie butu esa lesini lua.
Hoko eni kwetela rebe Lea iruelesie, Yakupe eni nana mena Rubena, eleki Simone, Lewi, Yehuda, Isakare, kai Zebulone.
Kwetela rebe Rahela iruelesie, Yusupe kai Benjamine.
Kai kwetela rebe Rahela eni tamata makerike Bilha irueleise, Dane kai Naptali.
Kai kwetela rebe Lea eni makerike Silpa irueleise, Gate kai Asere. Mere Yakupe eni kwete mokwai rebe ruelesi etei ndi Padan-Arame.
Eleki Yakupe iluake loko amai Ishake mpai Mamre tehaike kota Kiryat-Arba mere kota Hebrone. Otoi mere akmena upui Abrahame irue kenaere neka.
Ishake irue eti eni musuna utune esa butukwalu,
eleki imata ne. Imatare intua lakwai esa. Eleki eni nanae Esau kai Yakupe esi hnoukeni.